Afghanistan Embassy - Rome - د افغانستان د اسلامی جمهوریت سفارت - روم

د ایټالیا د فرهنګ وزارت له ستر سلاکار سره سفیر خالد احمد ذکریا او د سفارت دریم سکرتر کتنه

په روم - ایټالیا کې د افغانستان د اسلامي جمهوریت سفیر، خالد احمد ذکریا او د سفارت دریم سکرتر او د فرهنګي اړیکو مسئول، ښاغلي متین عادل، د ایټالیا د فرهنګ وزارت له ستر سلاکار، ښاغلي پاولو توسکی سره وکتل.

پدې ناسته کې د افغانستان سفیر، د افغانستان او ایټالیا ترمنځ تمدنی، تاریخي او استراتیژیکې اړیکې نه بیلیدونکې وبللې او هیله یې وکړه چې د کوربه هیواد د چارواکو او اداراتو په همکارۍ، د هغه د ماموریت په جریان کې به د دواړو هیوادونو په اړیکو کې نوی فصل په ځانګړي توګه په فرهنګي برخه کې پیل شي. متعاقباٌ، ښاغلي توسکی، سفیر ذکریا ته په روم کې د افغانستان اسلامی جمهوریت د سفیر په توګه د ګمارل کیدو له امله مبارکی وویله او هغه ته یې د ایټالیا د فرهنګ وزارت د دوه اړخیزو فرهنګی برنامې پلي کولو ته بشپړ چمتووالي ډاډ ورکړ.

دواړو لوریو د افغانستان د سولې پروسې او د افغانستان او ایټالیا تر منځ د ډیپلوماتیکو اړیکو د جوړیدو د سلمی کلیزې د لمانځنې په اړه هم په تفصیل خبرې وکړې.

په کابل کې د ایټالیا جمهوری سفیر، ښاغلی ویتوریو سَندلی سره په روم کې د افغانستان اسلامی جمهوریت سفیر کتنه

په کابل کې د ایټالیا جمهوری سفیر، ښاغلی ویتوریو سَندلی، او میرمن یې په روم کې د افغانستان اسلامي جمهوریت په سفارت کې د یوه کاری ضیافت لپاره رابلل شوې وې، او د سفیر خالد احمد ذکریا او د هغه میرمن سره یې ولیدل.

د کتنې په ترڅ کې، دواړو لوریو د افغانستان او ایټالیا تر منځ د ډیپلوماتیکو اړیکو د جوړیدو د سلمی کلیزې د لمانځنې لپاره د چمتووالي په اړه، د دوه اړخیزو اړیکو لا پیاوړتیا او د افغانستان اسلامی جمهویت ولسمشر او د ایټالیا لومړی وزیر ترمنځ د راتلونکو تلیفوني خبرو اهمیت په اړه بحث او تبادل نظر وکړ.

د غونډې په څنډه کې، سفیر سَندلی د ډیپلوماتانو او د سفارت کارمندانو سره ولیدل، او دواړو سفیرانو د د نوي هجري شمسي کال د پیل په مناسبت د سفارت په بڼ کې دوه یاد ګاری نیالګې کښت کړل.

په روم - ایټالیا کې د ا.ا.ج سفیر، خالد احمد ذکریا، د ملګری ملتونو د خوړو او کرنې سازمان عمومی رئیس ته خپل باورلیک په مجازی توګه وړاندې کړه

په روم - ایتالیا کې د افغانستان اسلامی جمهوریت سفیر، خالد احمد ذکریا، نن د ملګری ملتونو د خوړو او کرنې سازمان (FAO) عمومی رئیس، داکتر کو دنگیو (Qu Dongyu)، ته خپل باورلیک په مجازی توګه وړاندې کړه.

په روم کې د ایران د اسلامي جمهوریت او د پاکستان د اسلامي جمهوریت له سفیرانو سره د سفیر خالد احمد ذکریا ټلیفوني خبرې

په روم کې د افغانستان اسلامي جمهوریت سفیر، خالد احمد ذکریا د تیلیفونی اړیکی په ترڅ کې، په روم کې د ایران د اسلامي جمهوریت سفیر، ښاغلی حمید بیات او په روم کې د پاکستان د اسلامي جمهوریت سفیر ښاغلی جوهر سلیم سره خبرې وکړې.

د نوی لمړیز کال او د نوروز مبارکي ورکولو ترڅنګ، دواړو سفیرانو، سفیر ذکریا ته په روم کې د افغانستان اسلامی جمهوریت د سفیر په توګه د ګمارل کیدو له امله مبارکی وویله او د هغه د بریا هیله یې وکړه. د خبرو په ترڅ کې، دواړو لوریو د سیاسی او فرهنګی برخو کې یې د اړیکو په پراختیا هم بحث او تبادل نظر وکړ.

د افغانستان لپاره د ایټالیا له ځانګړي استازي او د ایټالیا د بهرنیو چارو او نړیوالو همکاریو په وزارت کې د افغانستان، خلیج هیوادونو او عربي ټاپوګانو برخې رئیس سره د سفیر خالد احمد زکریا لیدنه

په روم کې د افغانستان اسلامی جمهوریت سفیر، خالد احمد ذکریا، د افغانستان لپاره د ایټالیا له ځانګړي استازي، ښاغلي «Gianfranco Petruzzella»، او د ایټالیا د بهرنیو چارو او نړیوالو همکاریو په وزارت کې د افغانستان، خلیج هیوادونو، عربي ټاپوګانو او OIC برخې مشر، ښاغلي «Gianclemente De Felice» سره په یوه ویډیويي کنفرانس له لوری وکتل.
د کتنې په ترڅ کې، دواړو لوریو د افغانستان د سولې د بهیر، د افغانستان او د ایټالیا ترمنځ د ډیپلوماټیکو اړیکو د جوړیدو د سلمی کلیزې، کابل او هرات ته د ایټالیا د ځانګړي استازي راتلونکي سفر او په سیاسي، اقتصادي او فرهنګي برخو کې د راتلونکي کاري پلانونو په اړه خبرې وکړې.

د مارشال محمد قسیم فهیم د مړینې د اوومې کلیزې د لمانځغونډې مراسم

په روم کې د افغانستان اسلامی جمهوریت سفارت د مارشال محمد قسیم فهیم د مړینې اووم تلین په یوه مراسم کې ولمانځل شو.

د کرونا ویروس د رامينځته شوي وضعيت او محدوديتونو له امله، دغه مراسم یوازی په روم کې یو شمیر افغان ملکی او نظامی افسرانو او د سفارت ديپلوماتانو او کارکوونکو په ګدون ترسره شوه. پدی مراسمو کې، په روم کې د ا.ا.ج سفیر، خالد احمد ذکریا، د مارشال فهیم د کړنو او شخصیت ستاینه وکړه او د نظام او ملی نهادونو په ملاتړ کې یی د هغه رول اړين او بنسټيز وباله.

همدارنګه، ټولو ګډونوالو د لوی خدای له درباره په هېواد کې د تلپاتې سولې لپاره او د ارواښاد مارشال محمد قسیم فهیم، د هیواد د امنیتی او دفاعی ځواکونو شهیدانو او د وروستیو حوادث شهیدانو روح ته دعا وکړه.

د افغانستان د امنيتي او دفاعي ځواکونو د ملاتړ ملي ورځ ولمانځل شو

په روم - ايټاليا کې د افغانستان اسلامی جمهوريت سفارت، په ناټو دفاعی کالج کې د ملکي او نظامي افسرانو «NATO Defense College»، د ايټاليا د ستراتيژيکو مطالعاتو لپاره نظامي مرکز افسرانو «CeMiSS» او د ګډ خدماتو کارکنانو کالج افسران «The Joint Services Staff College» په حضور په سفارت کې د افغانستان د امنيتي او دفاعي ځواکونو د ملاتړ ملي ورځ ولمانځل شو. په دې غونډه کې، د افغانستان سفير د هېواد د امنيتي او دفاعي ځواکونو د فداکاری او قربانيو څخه مننه او قدردانی وکړه او د سولې، ځمکنۍ بشپړتیا او ملی حاکمیت په لور‌ کی د ټولو شهيدانو روح ته دعا وکړه.

په روم کې د افغانستان اسلامی جمهوریت سفیر، خالد احمد ذکریا، د ایټالیا د کوئرینیال په مانۍ کې خپل باورلیک جلالتمآب سرجیو ماتارلا ته وړاندې کړه

په روم کې د افغانستان اسلامی جمهوریت سفیر، خالد احمد ذکریا، د کب په ۱۴م کې، د ایټالیا د کوئرینیال په مانۍ کې په یوه تشریفاتې مراسم، خپل باورلیک د ایټالیا جمهوریت جمهور رئیس، جلالتمآب سرجیو ماتارلا ته وړاندې کړه او د جلالتمآب ولسمشر محمد اشرف غنی او د ا.ا.ج د خلکو درناوی او د ایټالیا سره د دوه اړخیزو همکاریو د لا پرختیا په اړه د افغانستان حکومت تمایل شریک کړل.

بوسنیا او هرزګوينا ته په روم کې د افغانستان د سفارت د پلاوي د ليدنې راپور

د بوسنيا او هرزګوينا د ليپا په کمپ کې د اور لګيدنې وروسته، په روم - ايټاليا کې د افغانستان اسلامي جمهوريت سفارت، د بهرنيو چارو وزارت د هدايت په اساس، د 2021 کال د جنوري په 4-۸، د دوه ډيپلوماتانو په ګډون په هغه هيواد کې يو پلاوی چې هر يو يې رحمان نظر بليم، دوهم سکرتر او عبدالمتين عادل ،دريم سکرتر وی، واستاو، ترځو د افغان مهاجرو وضعيت څخه ليدنه او بررسی کوي.

په رارسيدو سره، پلاوي په «ليپا»، «بوريچي»، «سيډرا»، «حاجيجي» او نورو کمپونو کې له افغان مهاجرينو سره خبرې وکړې او د دوی د اوسني وضعيت په اړه يې يو مفصل راپور چمتو کړ او د افغانستان اسلامي جمهوري دولت ته يې واستاوه.

پلاوي د کوربه هيواد چارواکو او نورو اړوندو نړيوالو سازمانونو لکه «IOM ،UNHCR ،UNICEF، Danish Refugee Council، Red Cross، Save the Children او UNFPA» سره هم په جلا جلا ډول وکتل، او د افغان مهاجرينو د وضعيت په اړه د افغان حکومت انديښنه څرګنده کړې او د دوی د ستونزې د حل لپاره يې د بيړني اقدام غوښتنه کړې.

پلاوی، درې راپورونه: 1. لنډ راپور؛ .2 مهاجرينو ته د بيړني مرستو د پلان ميتريکس راپور؛3 . او يو مفصل او تشريحي راپور چې مشخص او عملي وړانديزونه لري، چمتو کړی او د افغانستان د بهرنيو چارو وزارت او د دې لارې د افغانستان اسلامی جمهوریت لوی مقام ته يې ليږلي دي.

د افغانستان د اسلامي جمهوريت لوی مقام د پلاوي لخوا وړانديز شوي وړانديزونه ومنل او د بهرنيو چارو وزارت، د عامې روغتيا وزارت او نورو اړوند اداراتو ته يې لارښوونه وکړه چې د سفارت پلاوي وړانديزونو په پام کې ونيسي او په بوسنيا او هرزګوينا کې د مهاجرينو وضعيت ښه کولو لپاره بيړني اقدام وکړي.

په روم کې د افغانستان د اسلامي جمهوريت سفارت دغه مسئله له نږدې څخه تعقيبوي او د مهاجرت نړيوال سازمان له استازو او په هيواد کې د نورو سازمانونو سره کار کوي ترڅو په دغه کمپونو کې د افغان مهاجرينو بېړنۍ ستونزې او اړتياوې ژر تر ژره حل کړي؛ لکه څنګه چې په ۲۲/۱۱/۱۳۹۹ نيته، د سفارت پلاوي د ښاغلي فخرالدين دوسلياک، مستشار وزير مختار، او ښاغلي اليګزانډر بوډيسا، د ايټاليا په روم کې د بوسنيا او هرزګوينا د سفارت لومړی سکرتر سره وکتل او په دې مسلو په اړه بحث او تبادل نظر يې وکړ. پلاوي د بوسنيا هرزګوبنا د امنيت د چارو وزير سلاکار، ښاغلي عصمت فاتح سره ويډيو کنفرانس هم درلو، چې له اسلام اباد-پاکستان څخه د هغه د استازيتوب له لاري د افغان مهاجرينو د مديريت په اړه د يوه ميکانيز او تفاهم د مرستي خبر ورکړ.

د افغانستان د اسلامي جمهوريت د سفارت مقام يو ځل بيا په ښکاره ډول تاييدوي چې د دې سفارت همکاران، د يو واحد او خدمت گذار ټيم په توګه، تل په ايټاليا او نورو هيوادونو چې دا سفارت د غير ميشته په توګه کار کوي، ميشتو ګران هيوادوالو په خدمت کې دي او د افغانستان ټولو قومونو ترمنځ د يووالی او همغږی د ساتلو لپاره اغيزمن ګامونه اخيستی دي.

د افغانستان د امنیتي او دفاعي ځواکونو د ملاتړ ملي ورځ د رارسيدو په ويار پيغام!

په روم - ایټالیا کې د افغانستان د اسلامي جمهوریت سفارت د کب ۹ مه، د افغانستان د امنیتي او دفاعي ځواکونو د ملاتړ ملي ورځ، د هیواد ټولو زړورو زامنو او د خپلواکۍ، ځمکنۍ بشپړتیا او ملي ارزښتونه ریښتیني ساتونکو ته مبارکي وایی او د دوی د قربانیو او فداکاریو څخه مننه او قدرداني کوي. همدارنګه، د هېواد د امنیتي او دفاعي ځواکونو د سرښندونکو او زړورو شهیدانو پاک روح ته، چې د وطن او خلکو په ساتنه کې یې خپل خوږ ژوند له لاسه ورکړی، د زړه له کومي څخه دعا او د دوی یادونو ته درناوی کوي.